No er me langt uti september allereie og skuledagen har fått «satt seg» for elevane – og oss tilsette. Det er alltid spanande å sjå korleis ein landar etterkvart som dagane og vekene går. Nokon slit med heimlengt, nokon syns overgang til vidaregåande er litt tøff – og ikkje minst å bu så tett oppå kvarandre som ein gjer på internatskule. Når det òg er samla så mykje ungdom «under ombyggjing» seier det seg sjølv at det blir litt testing av grenser i og med ikkje foreldre er i nærleiken. Inn-på-rom og stilletid er for nokon uforståeleg, medan andre treng det i rikeleg mål. Slik er me ulike – også elevane våre. Me jobber med grensesetjing heile tida, slik at det skal vere godt og trygt for alle å bu her/gå her. Til no har me ikkje opplevd store utfordringar i så måte. Internatavdelinga har fått gjennomført samtale med nye internatbuarar. Sosiallærarane skal no snart ha samtaler med heimebuande elevar. I slike samtaler kjem det ofte fram, og ein får fange opp, problemstillingar som ein kan få gjere noko med.

Laurdag 25.10.ber me inn til Foreldredag her på Framnes. Me har ein slik dag no på hausten og ein på etterjulsvinteren, i februar. Vedlagt finn de program komande samling, samt tlf og epost til kontaktlærar til ungdomen din. Ta kontakt med denne om de ynskjer ein samtale ila dagen de er her. Det er satt av tid til slike samtaler.

Kvar haust på denne dagen, går Misjonsløpet. I år går inntekta til Stefanusalliansen som er russen sitt misjonsprosjekt. Dette vil de nok få høyre om frå ungdomen din (evt sponse pr runde el.l.).  Om nokon av dykk foreldre/føresette ynskjer å delta på løpet, er det fullt mogeleg.

Forrige veke evar alle i vg3 i Spania saman med nokre av dei tilsette. Dei to klassane på vg2 studiespes. har fått innvilga besøk på Stortinget, og reiser kvar sine turar til Oslo, med ei overnatting no før haustferien.

Så vert det haustferie… Tenkjer det blir godt for ungdomane å kome heim og kvile seg litt ei vekes tid! Medan det er haustferie, får me eit stort innrykk av ca 300 konfirmantar som skal vere her på leir. Desse skal bu på sovesalar og ha fullt opplegg i 3-4 dagar. Never a dull moment for å seie det på godt norsk!

Venleg helsing
Oss på Framnes